TI PARADI AN MWEN ( Mon petit paradis)
Ti Paradi an mwen, fout mwen enmé'w onpil!
Ou sé zyé an mwen ki ka wouvè
avan van, lè zwazo komansé chanté
é solèy komansé wouvè zèl a-y,
asi bitasyon a la gwadloup.
Ha ti Paradi an mwen, fout mwen enmé'w onpil!
Ou sé dé men an mwen, ki ka chouboulé lalfabé
épi kouché démo kréyòl asi on fèy papyé
lè lèspri an mwen ka pati a la drive.
Ti Paradi an mwen, Fout mwen enmé-w onpil!
Ou sé ti kè an mwen, lèwvwè ka-la sonné
léwòz-la ka chayé mwen
é méné mwen alé jis o fiwmaman!
Men défwa , lè ladévenn wouvè zyé a-y ;
épi gwo niyaj nwè balayé syèl a-w,
sé onsèl gwo pousyè ki ka vèglé
é pri an gòj a zanfan a-w pou toufé yo.
Ti paradi an mwen fout ou ja pran fè!
Magré tousa ou tini fòs, davwa dépi lontan
ou ka goumé pou tiré pyé a-w
an vyé soulyé, menm si toutkalité
vyé van vanté pou chayé'w lòtbò.
Ti paradi an mwen sé pa pousa an ké hay vou
davwa ou toujou rété andidan Kò an mwen,
andidan kè an mwen, andidan nanm an mwen.
Ha ti paradi an-mwen fout mwen enme'w onpil!
M-J MACABRE
PHOTO: M-J MACABRE